Yn dilyn penderfyniad ein Prif Weithredwr, Carys Wynne-Morgan, i symud ymlaen i ddatblygu ei gyrfa, mae Bwrdd Ymddiriedolwyr Elusen Aloud yn falch o gyhoeddi mai Steve Dimmick fydd yn cymryd rôl Prif Weithredwr Interim yr elusen. Mae’r Bwrdd yn hynod ddiolchgar i Carys am ei gwaith ac yn estyn croeso cynnes iawn i Steve.
Fe fydd Steve yn arwain y tîm er mwyn sicrhau fod gweithgareddau Aloud yn parhau fel arfer a bod y cantorion ifanc yn cael y profiadau a’r gefnogaeth orau posib. Bydd hefyd yn cynorthwyo’r Bwrdd wrth iddynt ystyried y ffordd orau i barhau i gynnig profiadau trawsnewidiol i’n cantorion, fel ein bod yn gallu adeiladu ar y gwaith ardderchog a wnaed dros y blynyddoedd a chadw enw da a gwaith Aloud yn amlwg iawn ym myd cerddorol Cymru.
Dywedodd Steve Dimmick “Mae gan Aloud allu arbennig i ddod â phobl ifanc at ei gilydd a rhoi llais iddynt, ar y llwyfan ac mewn bywyd. Rwy’n gyffrous i weithio gyda’r tîm a’r Bwrdd i adeiladu ar y momentwm hwnnw. Fy ffocws fydd sicrhau parhad, cryfhau’r hyn sy’n gweithio a helpu i lunio pennod nesaf hyderus i’r elusen.”
Dywedodd Cadeirydd Bwrdd Ymddiriedolwyr Elusen Aloud, Dr Ian Rees “ Rydym yn falch o groesawu person mor ymroddgar, brwdfrydig a deinamig i arwain yr elusen dros y misoedd nesaf. Rydym yn benderfynol o sicrhau y bydd gwaith Aloud yn parhau am flynyddoedd i’r dyfodol ac yn awyddus i gydweithio gyda Steve i ganfod y ffordd orau i wneud hynny”.
