ONLY BOYS ALOUD
Côr Only Boys Aloud
Drwy ymarferion côr wythnosol, rydym ni’n defnyddio pŵer cydganu i ysbrydoli dynion ifanc i ddod o hyd i hyder, cymuned, llawenydd a chyfeillgarwch.
Lluniwyd Only Boys Aloud (OBA) o’r awydd i annog dynion ifanc Cymru i fod yn uchelgeisiol a rhoi iddynt y sgiliau i lwyddo mewn bywyd, ac mewn unrhyw yrfa. Gyda 200 o fechgyn yn mynychu 13 o gorau ledled Cymru, daw corau lleol ynghyd bob wythnos yn ystod y tymor i gael hwyl ac ymarfer mewn canolfannau cymunedol a chlybiau rygbi.
O gantorion profiadol i rai sydd erioed wedi rhoi cynnig arni o’r blaen, mae ein drysau wastad ar agor i aelodau newydd; gall unrhyw fachgen rhwng 11 a 19 oed ymuno. Mae OBA yn rhad ac am ddim, ac nid oes unrhyw glyweliadau na chwaith unrhyw farnu. Ein hethos yw bod yn gynhwysol; rydym ni’n agored i bawb, waeth beth yw eich cefndir.
OBA yw’r unig brosiect o’i fath yng Nghymru, a chaiff ei gynnal yn rhai o ardaloedd mwyaf difreintiedig y wlad. Mae’n ateb i’r lefelau isel o hunan-barch a dyhead sy’n aml yn rhan o brofiad bechgyn yn eu harddegau. Mae OBA yn darparu esiamplau cadarnhaol, cynyddu hyder, gwella llesiant, addysgu gwerthoedd parch ac amrywiaeth, ac yn meithrin cyfeillgarwch gydol oes.
Dan arweiniad arweinyddion corawl proffesiynol, caiff yr aelodau brofiadau cerddorol o ansawdd uchel, hyfforddiant perfformio a chyfleoedd i berfformio mewn digwyddiadau arbennig. Mae’r bechgyn yn canu repertoire amrywiol o ganeuon pop modern, darnau clasurol a cherddoriaeth gorawl draddodiadol Cymru.
Mae Alumni OBA wedi llwyddo mewn pob agwedd ar fywyd, ac maen nhw’n cynnwys sêr theatr gerdd, gwyddonwyr, cantorion opera, cyfrifyddion a heddweision.
Pam ymuno â Chôr Only Boys Aloud?
Cynyddu Hyder
Mae ein harweinyddion corawl profiadol yn helpu ein bechgyn i ddatblygu eu hunanhyder. Boed drwy berfformio ar lwyfan, cael llinell o unawd neu ganu mewn stiwdio recordio, bydd eu hunan-barch yn disgleirio drwy eu bywyd bob dydd.
Synnwyr o Gymuned
Mae ein haelodau a’u teuluoedd yn aml yn dweud bod cymryd rhan yn ein gweithgarwch fel bod yn rhan o deulu. Rydym yn falch o gael cyfrannu pobl egnïol sy’n chwarae mwy o ran yn ein cymdeithas.
Datblygu Sgiliau
Drwy OBA, mae ein haelodau’n dysgu sgiliau bywyd sy’n eu helpu i gyflawni’u potensial, waeth pa lwybr y byddan nhw’n ei ddewis mewn bywyd. Y tu hwnt i ganu, fe fyddan nhw’n cael profiad o weithio fel tîm, rhyngweithio ag eraill a siarad yn gyhoeddus.
Ymuno â Chôr
Dewch draw i’n hymarfer nesaf i brofi sut beth yw bod yn rhan o OBA. Rydym ni’n groesawgar, yn gyfeillgar ac yn hamddenol, ac wastad wrth ein bodd o weld wynebau newydd, felly beth am roi cynnig ar sesiwn i weld a yw at eich dant chi?
Rydym yn falch iawn ein bod yn ymestyn ein Corau OBA i Orllewin Cymru gan sefydlu corau newydd yn Sir Benfro, Ceredigion a Sir Gaerfyrddin.
Darllenwch ein eitem newyddion Mae Only Boys Aloud yn ehangu i’r Gorllewin i ddarganfod mwy neu cysylltwch â [email protected] i gofrestru eich diddordeb!
13 o Gorau
Dim Clyweliadau
200+ o Aelodau
Dim Ffioedd
“Mi symudais i o Fanceinion i ogledd Cymru yn 2015, a dyma grŵp o ffrindiau yn yr ysgol yn dweud a dweud wrthyf i am ddod i sesiwn OBA. Bryd hynny, a minnau’n ‘Hogyn o’r Ddinas’, mi oeddwn i’n meddwl fy mod i’n rhy cŵl i ganu mewn côr Cymreig. Yn y diwedd, i roi taw ar eu cecru, dyma fi’n mynd i sesiwn. Mi oeddwn i’n gwbl anghywir i feddwl nad oedd yn cŵl. Mi wnaeth bod yn aelod o OBA fy aeddfedu fel person, ac mi ydw i mor ddiolchgar am hynny. Fyswn i byth hyd yn oed yn gallu dychmygu cymaint o brofiadau hyfryd dwi wedi’u cael drwy OBA.”
“Bachgen swil heb hunanhyder oedd fy mab cyn iddo ddechrau yn Only Boys Aloud, ac mae wedi tyfu i fod yn ddyn sy’n hyderus ymysg pobl. Mae wedi dewis cerddoriaeth fel gyrfa yn sgil y cyfleoedd gafodd e a’r ffaith i fentoriaid OBA ei feithrin. Mae’n anodd rhoi mewn geiriau cymaint mae wedi newid ei fywyd ac mor falch a diolchgar ydw i fel mam.”
CEFNOGWCH NI
Helpwch i gadw'r gerddoriaeth yn fyw
Cyfrannwch
Drwy gyfrannu heddiw, fe fyddwch yn rhan o stori Aloud, yn ein helpu i roi profiadau cadarnhaol a all newid bywydau i bobl ifanc ledled Cymru.
Ymaelodi â Chynllun Calon
Aelodau Calon sy’n cynnal curiad Elusen Aloud, ac maen nhw’n chwarae rhan allweddol yn ein llwyddiant.
Codi Arian i Ni
P’un a ydych chi eisiau rhedeg marathon neu drefnu eich her elusennol eich hun, gallwch helpu i gefnogi ein gweithgarwch yn eich ardal leol.
